បទល្មើសនេសាទក្នុងបឹងទន្លេសាបខេត្តកំពង់ឆ្នាំង មានការឃុបឃិតពីលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង និងលោក លី ឡា នាយខណ្ឌរដ្ឋបាលជលផលខេត្តកំពង់ឆ្នាំង
បទល្មើសនេសាទក្នុងបឹងទន្លេសាបខេត្តកំពង់ឆ្នាំង មានការឃុបឃិតពីលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង និងលោក លី ឡា នាយខណ្ឌរដ្ឋបាលជលផលខេត្តកំពង់ឆ្នាំងខេត្តកំពង់ឆ្នាំង មន្ត្រីរដ្ឋបាលជលផលក្នុងស្រុកបរិបូរណ៍ និងសមត្ថកិច្ចពាក់ព័ន្ធគឺជាអ្នកឃុបឃិតឲ្យបទល្មើសនេសាទប្រើឧបករណ៍ខុសច្បាប់ទ្រង់ទ្រាយធំកើតឡើងយ៉ាងមហន្តរាយដើម្បីជាថ្នូរនឹងផលប្រយោជន៍ផ្ទាល់ខ្លួនមិនខ្វល់ពីការរិះគន់អ្វីទាំងអស់ប្រភពពីប្រជានេសាទនៅឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង បានឲ្យដឹងថា បច្ចុប្បន្នបទល្មើសនេសាទប្រើឧបករណ៍ខុសច្បាប់កំពុងកើតឡើងយ៉ាងពេញបន្ទុកក្នុងមូលដ្ឋានពួកគាត់ ហើយមានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការបង្ក្រាបឡើយ។ ចំណែកលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង និងលោក លី ឡា នាយខ័ណ្ឌរដ្ឋបាលជលផលខេត្តកំពង់ឆ្នាំង កំពុងរក្សាភាពស្ងៀមស្ងាត់បណ្ដោយឲ្យបទល្មើសនេសាទប្រើឧបករណ៍ខុសច្បាប់ក្នុងតំបន់បឹងទន្លេសាប នៃស្រុកបរិបូរណ៍ រាលដាលកាន់តែខ្លាំងថែមទៀត។ ចំណែកប្រភពពីប្រជានេសាទជាលក្ខណៈគ្រួសារនៅឃុំពាមឆ្កោក ស្រុកជលគិរី ខេត្តកំពង់ឆ្នាំង ក៏បានឲ្យដឹងដែរថា ក្នុងមូលដ្ឋានពួកគាត់បទល្មើសនេសាទប្រើឧបករណ៍ខុសច្បាប់កំពុងរាលដាលកាន់តែខ្លាំងជាងមុនទៅទៀត។ ប្រភពបានឲ្យដឹងទៀតថា សូម្បីតែនៅក្នុងឡូត៍តំបន់អភិរក្សក៏មន្ត្រីជំនាញនិងសមត្ថកិច្ចពាក់ព័ន្ធឃុបឃិតឲ្យមានបទល្មើសនេសាទប្រើឧបករណ៍ខុសច្បាប់កើតឡើងយ៉ាងអនាធិបតេយ្យផងដែរ ព្រោះមន្ត្រីរដ្ឋបាលជលផល និងសមត្ថកិច្ចពាក់ព័ន្ធកំពុងសប្បាយប្រមូលលុយតាមរបៀបពុករលួយ។ ប្រជាពលរដ្ឋបានរិះគន់ថា លោក ឈួរ ច័ន្ទឌឿន អភិបាលខេត្តកំពង់ឆ្នាំង ក៏ដូចជាលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង និងលោក លី ឡា មេរដ្ឋបាលជលផលខេត្តកំពង់ឆ្នាំង មិនយកចិត្តទុកដាក់បង្ក្រាបនិងទប់ស្កាត់បទល្មើសនេសាទឲ្យស្របតាមបទបញ្ជាលេខ០០១ របស់រាជរដ្ឋាភិបាលនោះទេ។ មន្ត្រីរាជការនៅក្នុងមន្ទីរកសិកម្មខេត្តកំពង់ឆ្នាំង បានលើកឡើងថា ចាប់តាំងពីលោក លី ឡា ចូលកាន់តំណែងជានាយខណ្ឌរដ្ឋបាលជលផលខេត្តកំពង់ឆ្នាំង ជំនួសលោក សោម ភិរុណ រួចមកគឺបទល្មើសនេសាទប្រើឧបករណ៍ខុសច្បាប់ពុំមានការថយចុះគួរឲ្យកត់សម្គាល់នោះទេ។ ផ្ទុយទៅវិញបទល្មើសនេសាទប្រើឧបករណ៍ខុសច្បាប់ទ្រង់ទ្រាយធំនៅក្នុងតំបន់បឹងទន្លេសាប នៃស្រុកបរិបូរណ៍ ស្រុកកំពង់លែង ស្រុកជលគិរី និងស្រុកកំពង់ត្រឡាច កើតឡើងកាន់តែច្រើនជាងមុនទៅទៀតព្រោះមន្ត្រីរដ្ឋបាលជលផលក្នុងស្រុកទាំង៣នេះ ក៏ដូចជាលោក លី ឡា នាយខណ្ឌរដ្ឋបាលជលផលខេត្តកំពង់ឆ្នាំង គិតតែពីរឿងប្រមូលលុយចែកគ្នាធ្វើមានធ្វើបានយ៉ាងក្រអឺតក្រទម។ ដូច្នេះហើយទើបមានសេចក្ដីអំពាវនាវឲ្យលោក វេង សាខុន រដ្ឋមន្ត្រីក្រសួងកសិកម្ម និងលោក អេង ជាសាន អគ្គនាយករដ្ឋបាលជលផល ចាត់វិធានការបង្ក្រាបបទល្មើសនេសាទក្នុងតំបន់បឹងទន្លេសាប នៃខេត្តកំពង់ឆ្នាំង ប្រកបដោយប្រសិទ្ធភាពពិតប្រាកដ៕
ការិយាល័យនិពន្ធនាយកគេហទំព័រស្មីកំពង់ឆ្នាំងរក្សារសិទ្ធគ្រប់បែបយ៉ាងក្នុងការផ្សាយ៕
