លោកតាវ័យ៨១ឆ្នាំម្នាក់ត្រូវម៉ូតូធុនធំបុកស្លាប់យ៉ាងអាណោចអាធ័ម
លោកតាវ័យ៨១ឆ្នាំម្នាក់ត្រូវម៉ូតូធុនធំបុកស្លាប់យ៉ាងអាណោចអាធ័ម
ភ្នំពេញ ៖ លោកតាវ័យ៨១ឆ្នាំម្នាក់បាន បណ្តើរកង់ឆ្លងផ្លូវ លើកទាំងដៃជាសញ្ញា ត្រូវបានម៉ូតូធុនធំបើកបោះពួយយ៉ាងលឿន មកបុកទាំងកម្រោល បណ្តាលឲ្យលោកតា បោកក្បាលស្លាប់ភ្លាមៗនៅនឹងកន្លែង។
ហេតុការណ៍គ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងកាលពីវេលាម៉ោង ១២ និង៥០នាទីថ្ងៃទី០៧ ខែកុម្ភៈ ឆ្នាំ២០១៩ លើកំណាត់ផ្លូវជាតិលេខ៤ ក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានបញ្ជាក់ថា ជនរងគ្រោះមាន ឈ្មោះ សះ សែម អាយុ៨១ឆ្នាំ មានទីលំនៅ ភូមិកំរៀង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុ ជនរងគ្រោះ បានបណ្តើរកង់ ឆ្លងផ្លូវជាតិលេខ៤ ពីជើងទៅត្បូងទាំងដៃ ជាសញ្ញាផង ស្របពេលនោះ ស្រាប់តែមានម៉ូតូធុនធំមួយគ្រឿង ពណ៌លឿង មិនចាំម៉ាក ស្លាកលេខ បើកបរក្នុងល្បឿនលឿនពីលិចទៅកើត ជ្រុលមកបុកលោកតា ដែលកំពុងបណ្តើរកង់ពេញទំហឹង ផ្លោងខ្ទាតជាច្រើនម៉ែត្រ បណ្តាលឲ្យបោកក្បាលស្លាប់ភ្លាមៗនៅកណ្តាលផ្លូវជាតិយ៉ាងអាណោចអធ័មតែម្ដង។ បន្ទាប់មកម៉ូតូជនបង្កបានបន្ថែមល្បឿនបើករត់គេចតាមបណ្តោយផ្លូវជាតិលេខ៤ បាត់ស្រមោល បន្សល់ទុកតែសាកសព និងកង់ រួមជាមួយកាងម៉ូតូខាងក្រោយធ្លាក់លើផ្លូវ នៅកន្លែងកើតហេតុ។
ក្រោយកើតហេតុ សមត្ថកិច្ចចុះទៅពិនិត្យ និងវាស់វែងនៅកន្លែងកើតហេតុ ប្រគល់សពជូនក្រុមគ្រួសារ ចាត់ចែងដឹកយកទៅធ្វើបុណ្យតាមប្រពៃណី និងបន្តធ្វើការស្រាវជ្រាវ ស្វែងរកម៉ូតូបង្ក ដើម្បីដោះស្រាយតាមច្បាប់ ៕
