សូមប្រុងប្រយ័ត្នតំបន់មាត់សមុទ្រខណៈវិសម្ពាធទៅផុតព្យុះថ្មីមកដល់
ពេញៈក្រោយពីវិសម្ពាធ(TD)បានដើរទៅផុតពីប្រទេសកម្ពុជាសម្ពាធទាបមួយនៅចុងនៃប្រព័ន្ធសម្ពាធទាបក្នុងសមុទ្រចិនខាងត្បូងបានវិវត្តទៅជាសម្ពាធទាបសកម្មACTIVELOWនឹងអាចក្លាយទៅជាព្យុះទី១៥នៅថ្ងៃទី១១ខែតុលាមានដំណើរកាត់លើឆ្នេរភាគកណ្តាលប្រទេសវៀតណាមមុនដល់តំបន់ព្រំដែនកម្ពុជា ឡាវ។
លោកចាន់យុត្ថាអ្នកនាំពាក្យនិងជារដ្ឋលេខាធិការក្រសួងធនធានទឹកនិងឧតុនិយមបានឱ្យដឹងនៅថ្ងៃទី១០ខែតុលាឆ្នាំ២០២០ថាៈស្ថានភាពផ្ទៃមេឃអាប់អួរនិងមានភ្លៀងធ្លាក់រាយប៉ាយក្នុងកម្រិតពីតិចទៅបង្គួរនៅក្នងក្របខណ្ឌទូទាំងប្រទេសនៅបន្តកើតមានពេញមួយថ្ងៃទី១០ខែតុលានេះទៀត។
តែចាប់ពីថ្ងៃទី១១ខែតុលាទៅស្ថានភាពភ្លៀងធូរស្រាលមកវិញបន្តិចសម្រាប់តំបន់ទំនាបកណ្តាលភាគពាយព្យបន្ទាប់ពីសម្ពាធទាបសកម្មមួយនៅក្នុងសមុទ្រចិនខាងត្បូងបានវិវត្តទៅជាព្យុះទី១៥ហើយដើរឡើងគោកនៅឆេ្នរភាគកណ្តាលប្រទេសវៀតណាម មុននឹងឆ្លងនៅចន្លោះព្រំដែនកម្ពុជា ឡាវ។
អ្នកនាំពាក្យក្រសួងជំនាញខាងលើបញ្ជាក់ថាព្យុះទី១៥នេះមានការវិវត្តលឿនពេលវាក្លាយជាព្យុះបានស្រូវទាញសភាពអាប់អួរនៅលើផ្ទៃប្រទេសអស់មួយផ្នែកធ្វើឱ្យភ្លៀងចុះខ្សោយនៅតំបន់ទំនាបកណ្តាល។តែមានភ្លៀងច្រើនខ្យល់ខ្លាំងនៅតំបន់មាត់សមុទ្ររលកខ្ពស់ៗនិងនៅភាគឦសាននៃប្រទេសមានខ្យល់ ខ្លាំងនិងភ្លៀងនៅអំឡុងពីថ្ងៃទី១១ដល់១៣ខែតុលា។ ព្យុះនេះធ្វើឱ្យមានភ្លៀង ធ្លាក់ ច្រើននៅអាងទន្លេមេគង្គលើនិងនៅក្រោយថ្ងៃទី១៤ខែតុលាស្ថានភាពភ្លៀងធ្លាក់រាយប៉ាយនឹងកើតមានជាធម្មតាវិញនៅទូទាំងប្រទេស៕
